ഓൺലൈൻ ബുക്കിംഗ് സൗകര്യം ആയില്ല.കോന്നി : ഉദ്ഘാടനം കഴിഞ്ഞ് ആറ്‌ വര്‍ഷങ്ങള്‍ പിന്നിട്ടിട്ടും അടവി ഇക്കോ ടൂറിസം പദ്ധതിയുടെ ഭാഗമായ പെരുവാലിയിലെ മുളംകുടിലുകളില്‍ ഓണ്‍ലൈന്‍ ബുക്കിംഗ് സൗകര്യം ഏര്‍പ്പെടുത്താന്‍ വനംവകുപ്പിന് സാധിക്കുന്നില്ല.
കഴിഞ്ഞ പതിനൊന്ന് മാസമായി അടഞ്ഞുകിടന്ന മുളങ്കുടിലുകള്‍ സഞ്ചാരികള്‍ക്കായി തുറന്നു നല്‍കിയെങ്കിലും ഓണ്‍ലൈന്‍ ബുക്കിംഗ് ആരംഭിക്കാത്തതിനാല്‍ കൂടുതല്‍ സഞ്ചാരികളെ ആകര്‍ഷിക്കാന്‍ കഴിയുന്നില്ല. നവീകരിച്ച നാല് മുളങ്കുടിലുകളും ഒരു ഡയിനിംഗ് ഹാളുമാണ് ഇപ്പോള്‍ തുറന്നത്. കഴിഞ്ഞ മേയില്‍ കൊവിഡ് വ്യാപനത്തെ തുടര്‍ന്ന് കുടിലുകള്‍ അടയ്ക്കുകയായിരുന്നു. കാറ്റില്‍ മരം ഒടിഞ്ഞു വീണ് കുടിലുകളുടെ മേല്‍ക്കൂര തകര്‍ന്നത് മാസങ്ങള്‍ കഴിഞ്ഞാണ് പുനര്‍നിര്‍മ്മിച്ചത്.
കുടിലിന്റെ തറ, ശുചിമുറി, മേല്‍ക്കൂര തുടങ്ങിയവ എല്ലാം പുനര്‍നിര്‍മ്മിച്ചു. കൈവരികളും പെയിന്റ് ചെയ്ത് നവീകരിച്ചു. നാലുപേര് അടങ്ങുന്ന കുടുംബത്തിന് 4000 രൂപയാണ് ഒരു രാത്രിയും പകലും താമസിക്കുന്നതിനുള്ള നിരക്ക്. ആഹാരത്തിനുള്ള പണം ഇതിന് പുറമെ കൊടുക്കണം. ഓണ്‍ലൈന്‍ ബുക്കിംഗ് ഇല്ലാതിരുന്നിട്ട് കൂടി ആരംഭത്തില്‍ 10 ലക്ഷം രൂപ മാസവരുമാനം ലഭിച്ചിരുന്നു. ഓണ്‍ലൈന്‍ ബുക്കിംഗ് ആരംഭിച്ചാല്‍ കൂടുതല്‍ സഞ്ചാരികളെ ആകര്‍ഷിക്കാന്‍ കഴിയും. 2016 സെപ്തംബറിലാണ് അടവി ഇക്കോ ടൂറിസം പദ്ധതിയുടെ ഭാഗമായി പെരുവാലിയില്‍ മുളംകുടിലുകള്‍ സഞ്ചാരികള്‍ക്കായി തുറന്നുനല്കിയത്.
Be the first to comment