6 വർഷത്തെ ഇടവേളക്ക് ശേഷം വിൻഡോസ് 11നുമായി മൈക്രോസോഫ്റ്റ്

ആൻഡ്രോയിഡ് ആപ്ലിക്കേഷനായുള്ള പിന്തുണ സഹിതമാണ് വിൻഡോസ് 11നെ മൈക്രോസോഫ്റ്റ് തയ്യാറാക്കിയിരിക്കുന്നത്. പരിഷ്കരിച്ച ഇന്റർഫേസ്, സ്ഥാനചലനം സംഭവിച്ച സ്റ്റാർട്ട് മെനു, പുതിയ സ്റ്റാർട്ടപ്പ് ശബ്‌ദം എന്നിങ്ങനെ മാറ്റങ്ങൾ നിരവധിയാണ്.സ്‌ക്രീനിന്റെ മധ്യഭാഗത്തായി ക്രമീകരിച്ചിരിക്കുന്ന സ്റ്റാർട്ട് മെനു വിൻഡോസ് 11ൽ പുതുമയാണ്.സ്‌ക്രീനിന്റെ ഇടതുവശത്ത് നിന്ന് സ്വൈപ്പ് ചെയ്താൽ വിഡ്‌ജെറ്റുകൾ പ്രദർശിപ്പിക്കും.മൈക്രോസോഫ്റ്റിന്റെ സ്വന്തം ടീംസ് ആപ്പ് വിൻഡോസ് 11ലേക്ക് നേരിട്ട് സംയോജിപ്പിച്ചിട്ടുണ്ട്.

2015 ജൂലായിലാണ് അമേരിക്കൻ ടെക് ഭീമനായ മൈക്രോസോഫ്റ്റ് ഡെസ്ക്ടോപ്പ്, ലാപ്ടോപ്പുകളുടെ ഓപ്പറേറ്റിംഗ് സിസ്റ്റമായ വിൻഡോസ് 10 അവതരിപ്പിച്ചത്. 6 വർഷത്തെ ഇടവേളക്ക് ശേഷം വിൻഡോസ് 11 അവതരിപ്പിച്ച് മാക്ഒഎസ്, ക്രോംഒഎസ് ഓപ്പറേറ്റിംഗ് സിസ്റ്റങ്ങൾക്ക് ശക്തമായ വെല്ലുവിളി ഉയർത്തുകയാണ് മൈക്രോസോഫ്റ്റ്. കെട്ടിലും മട്ടിലും കാര്യമായ പുതുമയുമായി അവതരിപ്പിച്ച വിൻഡോസ് 11 ഒരു പിടി ഫീച്ചർ അപ്ഗ്രെയ്‌ഡുകളുമായാണ് വിപണിയിലെത്തിയിരിക്കുന്നത്.

പരിഷ്കരിച്ച ഇന്റർഫേസ് ആണ് വിൻഡോസ് 11-ലെ പ്രധാന മാറ്റം. വിൻഡോസ് 10ൽ എല്ലാ മെനു, വിൻഡോകളുടെ പാർശ്വങ്ങൾ ഷാർപ്പ് ആണെങ്കിൽ വിൻഡോസ് 11-ൽ വൃത്താകൃതിയിലുള്ള കോണുകളാണ്. പെർഫോമൻസിൽ ഈ മാറ്റത്തിന് സ്വാധീനമില്ല എങ്കിലും കാഴ്ച്ചയിൽ ഇന്റർഫെയ്‌സിന് പുതുമ നൽകുന്നുണ്ട്.

സ്‌ക്രീനിന്റെ മധ്യഭാഗത്തായി ക്രമീകരിച്ചിരിക്കുന്ന സ്റ്റാർട്ട് മെനു മറ്റൊരു പുതുമയാണ്. 1996ൽ അവതരിപ്പിച്ച വിൻഡോസ് NT 4.0 മുതൽ തന്നെ സ്റ്റാർട്ട് മെനു ഇടതുവശത്തായാണ് ക്രമീകരിച്ചിരുന്നത്. എന്നാൽ മധ്യഭാഗത്തേക്കുള്ള സ്ഥാനചലനം മാക്ഒഎസ്, ക്രോംഒഎസ് ഓപ്പറേറ്റിംഗ് സിസ്റ്റങ്ങൾക്ക് സമാനമായാണ് ഒരുക്കിയിരിക്കുന്നത്. എഡ്ജ്, ഫയൽ എക്‌സ്‌പ്ലോറർ തുടങ്ങിയവയുടെയും ഐക്കണുകൾ മധ്യഭാഗത്തേക്ക് മാറ്റിയിട്ടുണ്ട്. അതെ സമയം സെറ്റിങ്സിൽ മാറ്റം വരുത്തി ഈ ക്രമീകരണം സ്‌ക്രീനിന്റെ ഇടത്തോട്ടോ വലത്തോട്ടോ മാറ്റാവുന്നതാണ്.

വിൻഡോസ് 10ന്റെ സ്റ്റാർട്ട് മെനുവിൽ പ്രദർശിപ്പിച്ചിരുന്ന ലൈവ് ടൈൽസ് വിൻഡോസ് 11ൽ ഇല്ല. പകരം റെക്കമെൻഡഡ്‌ ആപ്പ്സ് എന്ന പേരിൽ ഉപഭോക്താവിന് പ്രസക്തമായ ചില ആപുകൾ സ്റ്റാർട്ട് മെനുവിന്റെ കീഴ്ഭാഗത്ത് പ്രദർശിപ്പിക്കും. പുതിയ സ്റ്റാർട്ടപ്പ് ശബ്‌ദം ഉൾപ്പെടെ അലേർട്ടുകൾക്ക് വിൻഡോസ് 11 വ്യത്യസ്തമായ ശബ്ദമാണ്. പുതിയ തീമുകൾ, പുതിയ വാൾപേപ്പറുകൾ, മികച്ച ഡാർക്ക് മോഡ് എന്നിവയും വിൻഡോസ് 11ൽ ഉൾപെടുത്തിയിട്ടുണ്ട്.

സ്‌ക്രീനിന്റെ ഇടതുവശത്ത് നിന്ന് സ്വൈപ്പ് ചെയ്താൽ വിഡ്‌ജെറ്റുകൾ പ്രദർശിപ്പിക്കും. ഉപഭോക്താവിന്റെ മുൻ‌ഗണന അനുസരിച്ച് വിഡ്ജറ്റുകൾ‌ പുനക്രമീകരിക്കുന്നതിനോ അല്ലെങ്കിൽ‌ വലിപ്പം കൂട്ടുന്നതിനോ കുറയ്ക്കുന്നതിനോ ഉള്ള സംവിധാനവും ഒരുക്കിയിട്ടുണ്ട്.

ഒരേ സമയം ഒന്നിലധികം പ്രവർത്തികൾ ചെയ്യുന്നവർക്ക് മികച്ച മൾട്ടിടാസ്കിംഗ് അനുഭവത്തിനായി, ഡെസ്ക്ടോപ്പിന്റെ ഒന്നിലധികം ഏരിയകൾക്കിടയിൽ ആക്റ്റീവ് സ്ക്രീനുകൾ ഡിവൈഡ് മാക്സിമൈസ് ബട്ടൺ വഴി അനുവദിക്കും. മൈക്രോസോഫ്റ്റ് ഈ പുതിയ ഫീച്ചറിനെ സ്നാപ്പ് ലേയൗട്ടുകൾ എന്ന് എന്നാണ് വിളിക്കുന്നത്.
മൈക്രോസോഫ്റ്റിന്റെ സ്വന്തം ടീംസ് ആപ്പ് വിൻഡോസ് 11ലേക്ക് നേരിട്ട് സംയോജിപ്പിച്ചിട്ടുണ്ട്. ടാസ്‌ക്ബാറിൽ ക്രമീകരിച്ചിരിക്കുന്ന മിർക്കോസോഫ്റ്റ് ടീംസ് ആപ്പ് സന്ദേശമയയ്‌ക്കാനും വീഡിയോ കോൾ ചെയ്യാനുമുള്ള അപ്ലിക്കേഷനാണ്.
മൈക്രോസോഫ്റ്റിന്റെ എക്സ്ബോക്സ് സീരീസ് കൺസോളുകളിൽ നിന്ന് ഓട്ടോ എച്ച്ഡിആർ സവിശേഷത ഉൾപെടുത്തിയതാണ് വിൻഡോസ് 11ൽ ഗെയിമിങ് ആരാധകരെ സംബന്ധിച്ച് സന്തോഷകരമായ വാർത്ത. ഇത് എച്ച്ഡിആർ ഫീച്ചർ ചെയ്യാത്ത ഗെയിമുകളിൽ നിന്ന് പോലും എച്ച്ഡിആർ ഔട്പുട്ട് പ്രാപ്തമാക്കും. ക്‌ളൗഡ്‌ ഗെമിങ്ങിനായി എക്‌സ്ക്‌ളൗഡ്‌ ഇന്റഗ്രേഷനും, എക്സ്ബോക്സ് ഗെയിം പാസ് ആക്സസും നൽകിയിട്ടുണ്ട്.

മൈക്രോസോഫ്റ്റ് വിൻഡോസ് 11ൽ സ്റ്റോർ ആപ്ലിക്കേഷനും പരിഷ്കരിച്ചു. ലോഡ് ചെയ്യാനും വേഗത്തിൽ പ്രവർത്തിക്കാനും തക്കവിധം യുഐയിൽ മാറ്റം വരുത്തിയിട്ടുണ്ട്. എന്നാൽ ഏറ്റവും ശ്രദ്ധേയമായ കാര്യം ആൻഡ്രോയിഡ് ആപ്ലിക്കേഷനായുള്ള പിന്തുണയാണ്. ആമസോൺ, ഇന്റൽ എന്നിവയുമായുള്ള പങ്കാളിത്തത്തിലൂടെ നിലവിലുള്ള ആൻഡ്രോയിഡ് ആപ്ലിക്കേഷനുകൾ മൈക്രോസോഫ്റ്റ് സ്റ്റോർ വഴി ലഭ്യമാകും വിൻഡോസ് 11 ഉപഭോക്താക്കൾക്ക് ലഭിക്കും.

ടെസ്റ്റിംഗ് ആവശ്യങ്ങൾക്കായി ചുരുക്കം ചിലർക്കേ ആദ്യ ഘട്ടത്തിൽ വിൻഡോസ് 11 ലഭ്യമാവൂ. അതെ സമയം ഈ വർഷം അവസാനത്തോടെ വിൻഡോസ് 10 ഉപഭോക്താക്കൾക്ക് സൗജന്യമായി വിൻഡോസ് 11-ലേക്ക് അപ്ഗ്രേഡ് ചെയ്യാൻ സാധിക്കും എന്ന് മൈക്രോസോഫ്റ്റ് വ്യക്തമാക്കി. അധികം താമസമില്ലാതെ വിൻഡോസ് 7, വിൻഡോസ് 8 ഓപ്പറേറ്റിംഗ് സിസ്റ്റം ഉപയോഗിക്കുന്ന പിസികൾക്കും അപ്ഗ്രെയ്ഡ് ലഭിക്കും.കുറഞ്ഞത് 64-ബിറ്റ് x86 അല്ലെങ്കിൽ ARM പ്രോസസർ, 4 ജിബി റാമും, 64 ജിബി സ്റ്റോറേജും വിൻഡോസ് 11 ഇൻസ്റ്റാൾ ചെയ്യാൻ ആവശ്യമാണ്. വിൻഡോസ് 10ന് അതെ സമയം 4 ജിബി റാമും 64 ജിബി സ്റ്റോറേജും മാത്രം മതിയായിരുന്നു. ഇത് വിൻഡോസ് 11 ഹെവി ഫയൽ ആയിരിക്കും എന്നുറപ്പിക്കുന്നു.