പാനിപൂരി തയ്യാറാക്കാം

കാശ്മീർ മുതൽ കന്യാകുമാരി വരെ പ്രിയപ്പെട്ട ഇന്ത്യൻ സ്ട്രീറ്റ് ഫുഡ് അഥവാ സ്റ്റാർടർ എന്താണെന്ന് ചോദിച്ചാൽ പാനിപൂരി എന്നായിരിക്കും മിക്കവരുടെയും ഉത്തരം. കേരളത്തിന് ഇവ പരിചിതമായത് വളരെ കുറച്ച് നാളുകൾ കൊണ്ടാണ്.

പാനിപൂരി കഴിക്കുമ്പോൾ തോന്നിയ പോലെ പിച്ചി കഴിക്കാനും പറ്റില്ല. മുഴുവനായി ഒറ്റയടിക്ക് വായിലേക്ക് ഇടണം. ഇത്തിരി പുളിയും മധുരവും ഒപ്പം ചെറിയ എരിവുമുള്ള രുചി പറഞ്ഞറിയിക്കുക അസാധ്യമാണ്.

ഒരു കുഞ്ഞൻ പന്തിന്റെ ആകൃതിയിലുള്ള മൊരിഞ്ഞ പൂരിയിലേക്ക് പുളിയുള്ള വെള്ളം ചേർക്കും അതാണ് പാനി.
പ്രത്യേക രീതിയിലാണ് ഈ വെള്ളം തയ്യാറാക്കുന്നത്.ഈ പുളിവെള്ളത്തിൽ മുളക് പൊടി. ചാട്ട്, ഇമിലി ചട്നി അഥവ പുളി ചട്നി എന്നിവയുണ്ടാവും ഇതിലേക്ക് നല്ലവണ്ണം വേവിച്ച് ഉടച്ച് ഉരുളക്കിഴങ്ങ്, വെള്ളകടല ചേർക്കും. പിന്നെ സവാള അരിഞ്ഞതും ചേർക്കുന്നു. അൽപ്പം മല്ലിയിലയും ചേർത്താൽ അടിപൊളി

പൊതുവേ എരിവ്, പുളി എന്നിവ രണ്ട് ഫ്ളേവറുകളിലാണ് പാനിപൂരി ലഭിക്കുക. ചിലയിടങ്ങിൽ ഇതിലധികം ഫ്ളേവറുകളും ലഭിക്കും. ബേൽപൂരി,ദഹിപൂരി,സേവ് പൂരി തുടങ്ങി പാനിപൂരിയോട് സമാനമായ ചാട്ട് വിഭവങ്ങൾ ലഭ്യമാണ്. നേപ്പാളിൽ ലഭിക്കുന്ന ഫുച്ചക്ക,ഫുസ്ക്ക, പുസ്ക്ക എന്നീ പേരുകളിൽ അറിയപ്പെടുന്ന പാനിപൂരിയിൽ മസാല ചേർത്ത് വേവിച്ച ഉരുളക്കിഴങ്ങാണ് ധാരാളം ഇടുന്നത്. ഇതിലും സമാന രീതിയിൽ പുളിവെള്ളം ചേർത്താണ് കഴിക്കുന്നത്. ഈ വിഭവത്തിൽ എരിവാണ് മുന്നിട്ട് നിൽക്കുന്നത്. രുചിയൂറും പാനി പൂരി വീട്ടിൽ തന്നെ തയ്യാറാക്കിയാലോ

ആദ്യം പൂരിയിൽ ഒഴിക്കാനുള്ള പാനി അഥവാ വെള്ളം തയ്യാറാക്കം
ഇതിലേക്ക് ഒരു കപ്പ് പുളി ചട്ണി ആദ്യം തയ്യാറാക്കണം

പുളി വെള്ളത്തിൽ കുതിർത്തത് – 100 ഗ്രാം
ശർക്കര -രണ്ട് സ്പൂൺ
ഉപ്പ് – രണ്ട് സ്പൂൺ
ഗരം മസാല – അര സ്പൂൺ
ചുക്ക് പൊടി – ഒരു സ്പൂൺ
കുരുമുളക് പൊടിച്ചത് – കാൽ സ്പൂൺ
മുളക് പൊടി – കാൽ സ്പൂൺ
ചാട്ട് മസാല – ഒരു സ്പൂൺ

ഇവയെല്ലാം ചേർത്ത് അരച്ച് ചട്ണി തയ്യാറാക്കാം

ശേഷം

പുതിന ഇല – ഒരു കപ്പ്
മല്ലി ഇല – ഒരു കപ്പ്
പച്ചമുളക് – 7
വറുത്ത് പൊടിച്ച ജീരകം – 2 ടേബിൾ സ്പൂൺ
ഉപ്പ് – ടേബിൾ സ്പൂൺ
മുളക് പൊടി – 1 ടീ സ്പൂൺ
വെള്ളം – 8 കപ്പ്

ചട്ണിയും ബാക്കി ചേരുവകളും നല്ലവണം മിക്സ് ചെയ്യുക

കുഞ്ഞൻ ഷേപ്പിൽ പൂരി തയ്യാറാക്കാം. മൊരിഞ്ഞിരിക്കാൻ പൂരി മാവ് കുറയ്ക്കുമ്പോൾ റവയും ചേർക്കാം

മൊരിഞ്ഞ പുരിയുടെ മുകൾ ഭാഗം ചെറുതായി പൊട്ടിക്കുക ഇതിലേക്ക് വേവിച്ച ഉരുളക്കിഴങ്ങ്, ബൂംദി, വെള്ളകടല വേവിച്ചത് എന്നത് ആവശ്യാനുസരണം ചേർക്കാം. ഇതിലേക്ക് തയ്യാറാക്കി വെച്ച വെള്ളം ചേർത്ത് മുഴുവനായി വായിലേക്കിട്ട് കഴിക്കാം. ആവശ്യമെങ്കിൽ പുളിചടനി അൽപ്പം മാറ്റിവെച്ച് അതും ഒഴിച്ച് കഴിക്കാം.

ആദ്യം പാനി തയ്യാറാക്കിയ ശേഷം പൂരി തയ്യാറാക്കുന്നതാണ് നല്ലത്. ചൂടോടെയുള്ള പൂരിയിൽ കഴിക്കാനാണ് രുചി.