കുട്ടികള്‍ക്കും വരാം ഫാറ്റിലിവർ; ഈ കാര്യങ്ങൾ ശ്രദ്ധിക്കുക

മുതിർന്നവരിൽ എന്ന പോലെ തന്നെ അക്യൂട്ട് ഹെപ്പറ്റൈറ്റിസ്, ക്രോണിക് ഹെപ്പറ്റൈറ്റിസ്, ഫാറ്റി ലിവർ സിറോസിസ് (കരൾ ചുരുക്കം), എന്നിവയെല്ലാം കുട്ടികളിലും കണ്ടുവരുന്നുണ്ട്. ഇതുകൂടാതെ കുട്ടികളിൽ മാത്രം കാണുന്ന ചില കരൾരോഗങ്ങളുമുണ്ട്. ശൈശവത്തിൽ കാണുന്ന കരൾവീക്കം, പിത്തക്കുഴലിലെ അടവോ വികാസക്കുറവോ കാരണമുണ്ടാകുന്ന മഞ്ഞപ്പിത്തം (cholestasis of infancy), കരളിൽ നീർ കുമിളകൾ (Cyst) കാരണമുണ്ടാകുന്ന ചില രോഗങ്ങൾ, ഉപാപചയ തകരാറുകളും ഗ്ലൈക്കോജൻ സംഭരണത്തിലെ പ്രശ്നങ്ങളും കാരണമുണ്ടാകുന്ന രോഗങ്ങൾ, ശരീരത്തിൽ ചെമ്പിന്റെ അളവ് ക്രമാതീതമായി വർധിക്കുന്ന വിൽസൺസ് രോഗം (Wilson’s disease), ഗ്ലൈക്കോജൻ (അന്നജം) സ്റ്റോറേജ് രോഗങ്ങൾ എന്നിവ ഇതിൽപെടും.

കുട്ടികളിൽ മഞ്ഞപ്പിത്തം പല തരത്തിലുണ്ടാവാം. ചുവന്ന രക്താണുക്കൾ ക്രമാതീതമായി നശിക്കുമ്പോൾ രക്തത്തിൽ ബിലുറൂബിൻ അളവ് കൂടുന്നു (unconjugated hyperbilirubinemia). ആർ.എച്ച്, എ.ബി.ഒ ഇൻകോംപിറ്റബിലിറ്റി (Rh, ABO incompatibility) എന്ന സ്ഥിതി കാരണം നവജാതശിശുവിലും ഈ അവസ്ഥ (Hemolytic jaundice) ഉണ്ടാകാം. കരളിനെയും പിത്തക്കുഴലിനെയും ബാധിക്കുന്ന രോഗങ്ങളാണ് കോൺജുഗേറ്റഡ് ഹൈപ്പർബിലിറുബിനീമിയ (Conjugated Hyperbilirubinemia). കോൺജുഗേറ്റഡ് ജോണ്ടിസിന്്((Conjugated jaundice) ഇത് കാരണമാകുന്നു.

കുട്ടികളിലെ കരൾവീക്കം

കുട്ടികളിലെ കരൾരോഗങ്ങളിൽ ഹെപ്പറ്റൈറ്റിസാണ് പ്രധാനം. അക്യൂട്ട് (പെട്ടെന്നുണ്ടായി തീവ്രസ്ഥിതിയിൽ എത്തുന്ന), ക്രോണിക് (പഴക്കം ചെന്ന കരൾവീക്കം) എന്നിങ്ങനെ ഹെപ്പറ്റൈറ്റിസ് രണ്ടുതരത്തിലുണ്ട്. എ, ഇ എന്നിവ അക്യൂട്ട് വിഭാഗത്തിൽ പെടും.

ഹെപ്പറ്റൈറ്റിസ് എ

സർവസാധാരണമായി കാണപ്പെടുന്ന കരൾവീക്കമാണിത്. രോഗാണുകലർന്ന ഭക്ഷണത്തിലൂടെയും വെള്ളത്തിലൂടെയും പകരുന്നു. രോഗബാധിതരുടെ മലത്തിലൂടെയാണ് പലപ്പോഴും വെള്ളവും അതുപയോഗിച്ച് പാകം ചെയ്യുന്ന ഭക്ഷണവും മലിനമാക്കപ്പെടുന്നത്.
പനിയും മഞ്ഞപ്പിത്തവും ചുരുക്കം ചില കുട്ടികളിൽ കരൾ പ്രവർത്തനരഹിതമാകാൻ (Acute liver failure) കാരണമായേക്കാം. ഹെപ്പറ്റൈറ്റിസ് എയ്ക്ക് പ്രതിരോധകുത്തിവെപ്പ് ലഭ്യമാണ്.

ഹെപ്പറ്റൈറ്റിസ് ഇ

ഇത് അത്രതന്നെ സാധാരണമല്ല. ഹെപ്പറ്റൈറ്റിസ് എയുടെപോലെത്തന്നെ അത് അക്യൂട്ട് ഹെപ്പറ്റൈറ്റിസ് ഉണ്ടാക്കുന്നു.

ദീർഘകാല മഞ്ഞപ്പിത്തം
ഹെപ്പറ്റൈറ്റിസ് ബി

ദീർഘകാല മഞ്ഞപ്പിത്തത്തിന്റെ കാരണങ്ങളിൽ ഹെപ്പറ്റൈറ്റിസ് ബി എന്ന വൈറസ് പ്രധാന പങ്കുവഹിക്കുന്നുണ്ട്. കുട്ടികളിലെ ഹെപ്പറ്റൈറ്റിസ് ബി പ്രധാനമായും രോഗബാധിതയായ അമ്മയിൽനിന്ന് ജനനസമയത്താണ് പകരുന്നത്. വളരെ നേരത്തേതന്നെ കുഞ്ഞിന് വൈറസ് ബാധ വരുന്നതിനാൽ ക്രോണിക് ഹെപ്പറ്റൈറ്റിസ്, സിറോസിസ്, കരളിലെ കാൻസർ (Hepatocellular carcinoma) എന്നിവയ്ക്ക് ഇത് വഴിയൊരുക്കാം. ചിലപ്പോൾ ഈ കുട്ടികൾ നിശ്ശബ്ദരായ അണുവാഹകർ ആവാനും സാധ്യതയുണ്ട്. അതുവഴി രോഗത്തിന്റെ സമൂഹവ്യാപനത്തിനും ഇടവരുന്നു.

ചില കുട്ടികളിൽ ഹെപ്പറ്റൈറ്റിസ് ബി ബാധിക്കുമ്പോൾ തന്നെ തീവ്ര ലക്ഷണങ്ങൾ പ്രകടമാകും. തലകറക്കം, ഛർദി, വിശപ്പില്ലായ്മ, കടുംനിറത്തിലുള്ള മൂത്രം, മഞ്ഞപ്പിത്തം തുടങ്ങിയ ലക്ഷണങ്ങൾ ഉണ്ടാകാം.

ഫലപ്രദമായ പ്രതിരോധ കുത്തിവെപ്പ് (Hepatitis B vaccine) ലഭ്യമാണ്. കുഞ്ഞുങ്ങളുടെ ഇപ്പോഴത്തെ ഇമ്മ്യൂണൈസേഷൻ ഷെഡ്യൂളിൽ അത് ഉൾക്കൊള്ളിച്ചിട്ടുമുണ്ട്.

Representative Image| Photo: GettyImages
അമ്മ ഹെപ്പറ്റൈറ്റിസ് ബി രോഗബാധിതയാണെങ്കിൽ പ്രസവസമയത്ത് കുഞ്ഞിലേക്ക് രോഗം പകരാതിരിക്കാൻ മുൻകരുതലുകൾ എടുക്കണം. കുഞ്ഞ് ജനിച്ചയുടനെ ഹെപ്പറ്റൈറ്റിസ് ബി ഇമ്മ്യൂണോ ഗ്ലോബുലിൻ എന്ന ഇൻജക്ഷനും തുടർന്ന് മൂന്ന് ഹെപ്പറ്റൈറ്റിസ് ബി വാക്സിൻ ഡോസുകളും എടുക്കേണ്ടതാണ്. ഇതിലൂടെ കുഞ്ഞിലേക്കുള്ള സംക്രമണവും ഭാവിപ്രശ്നങ്ങളും തടയാം.

ഹെപ്പറ്റൈറ്റിസ് സി

കുട്ടികളിൽ ഹെപ്പറ്റൈറ്റിസ് സി ബാധ താരതമ്യേന കുറവാണ്. എങ്കിലും ഈ അണുബാധ നീണ്ടുനിൽക്കുന്ന മഞ്ഞപ്പിത്തം (Chronic hepatitis), സിറോസിസ് എന്നിവയിലേക്കു നയിച്ചേക്കാം. രോഗബാധിതയായ അമ്മയിൽനിന്നും രക്തത്തിലൂടെ അല്ലെങ്കിൽ ഡയാലിസിസ്, രോഗാണു കലർന്ന രക്തത്തിന്റെ സാന്നിധ്യമുള്ള ടൂത്ത് ബ്രഷ്, നെയിൽ ക്ലിപ്പർ എന്നിവയിലൂടെയും ഹെപ്പറ്റൈറ്റിസ് സി പകരാം.

ഭൂരിഭാഗം കുട്ടികളിലും രോഗം നിശ്ശബ്ദമാണ്. ചില കുട്ടികളിൽ അത് ഗുരുതര സങ്കീർണതകൾ ഉണ്ടാക്കുന്നു. പനി, മഞ്ഞപ്പിത്തം, സന്ധിവേദന, ഛർദി, വയറുവേദന എന്നിവ രോഗലക്ഷണങ്ങളാണ്.

ഹെപ്പറ്റൈറ്റിസ് സി ആന്റിബോഡി ടെസ്റ്റ്, എച്ച്.സി.വി ആർ.എൻ.എ ടെസ്റ്റ്, എച്ച്.സി.വി ജീനോടൈപ്പ് ടെസ്റ്റ് (അണു ഏതു തരത്തിൽപ്പെട്ടതാണ് എന്നറിയുന്നതിനുള്ള ടെസ്റ്റ്) എന്നിവയിലൂടെ രോഗം കണ്ടെത്താം.

കുട്ടികളിലെ കരൾ ചുരുക്കം

കുട്ടികളിൽ പല ഘടകങ്ങളും കരൾചുരുക്കത്തിന് (സിറോസിസ്) കാരണമാകാം. പിത്തക്കുഴലിന്റെ വികാസപ്രശ്നങ്ങൾ, നവജാത ശിശുക്കളിലുള്ള കരൾവീക്കം, ഗാലക്ടോസീമിയ (Galactosemia), ടൈറോസിനീമിയ (Tyrosinemia) തുടങ്ങിയ രോഗാവസ്ഥകൾ ശൈശവത്തിലെ കരൾ ചുരുക്കത്തിന് ഇടയാക്കാം.

അല്പം കൂടി മുതിർന്ന കുട്ടികളിൽ വരുന്ന കരൾചുരുക്കത്തിന് പ്രധാന കാരണങ്ങൾ ഇനി പറയുന്നു:

അണുബാധ

ഹെപ്പറ്റൈറ്റിസ് ബി, സി കാരണമുണ്ടാകുന്ന ദീർഘകാല മഞ്ഞപ്പിത്തം.

ജനിതക/ ഉപാപചയ കാരണങ്ങൾ

ഗാലക്ടോസീമിയ, അന്നജം അടിഞ്ഞുകൂടുന്ന രോഗങ്ങൾ (Glycogen storage disease), ഗോഷർ രോഗം (Gaucher’s disease), വിൽസൺസ് രോഗം (Wilson’s diseas), പിത്തത്തിന്റെ ഒഴുക്കിൽ
തടസ്സം (Biliary cirrhosis).

പിത്തത്തിന്റെ ഒഴുക്കിൽ തടസ്സം (Biliary cirrhosis)

പിത്തത്തിന്റെ ഒഴുക്കിൽ തടസ്സം വന്ന് കരൾചുരുക്കം ഉണ്ടാകുന്ന അവസ്ഥ. ബിലിയറി അട്രീഷ്യ (biliary atresia), കോളിഡോക്കൽ സിസ്റ്റ് (Choledochal cysts),വാട്ട്സൺ അലഗിൽ സിൻഡ്രോം (watson alagille syndrome) എന്നിവ കാരണങ്ങളാണ്.

വിൽസൺസ് രോഗം

ചെമ്പിന്റെ ഉപാപചയത്തിൽ തകരാർ വരുന്നതിനാൽ ഉണ്ടാകുന്ന രോഗമാണ് വിൽസൺസ് രോഗം. ജനിതകമായ ഈ രോഗം ATP 7B എന്ന ജീനിൽ വരുന്ന ക്രമക്കേടുകൾ കാരണമാണ്. കരളിൽ ചെമ്പ് അടിഞ്ഞുകൂടി സിറോസിസിന് കാരണമാവുന്നു.

ഗ്ലൈക്കോജൻ സ്റ്റോറേജ് ഡിസീസ് (Glycogen storage disease)

ഗ്ലൈക്കോജൻ എന്ന അന്നജത്തിന്റെ ഉപാപചയത്തിന്റെ അളവിലും ഘടനയിലും വരുന്ന മാറ്റങ്ങൾ, ജനിതകമായി സംഭവിക്കുന്ന പല എൻസൈമുകളുടെ കുറവിനാൽ രക്തത്തിൽ ഗ്ലൂക്കോസിന്റെ അളവ് താഴുന്നു (Hypoglycaemia). ലാക്ടിക് അസിഡോസിസ് (Lactic acidosis) അഥവാ ശരീരത്തിൽ യൂറിക്ക് ആസിഡ്, കൊഴുപ്പ് എന്നിവ ക്രമാതീതമായി വർധിക്കുന്നു.

കോളിസ്റ്റാസിസ് ഓഫ് ഇൻഫൻസി

ശൈശവാവസ്ഥയിൽ ചിലപ്പോൾ നവജാത ശിശുക്കളിൽതന്നെ വരുന്ന കരൾവീക്കം (Hepatitis) പിത്തക്കുഴലുകളുടെ വികാസക്കുറവ് (Biliary atresia) എന്നിവ കാരണമായേക്കാം.
കടുത്ത മഞ്ഞപ്പിത്തവും പിത്തത്തിന്റെ ഒഴുക്കിലുള്ള തടസ്സം കാരണം വെളുത്ത നിറത്തിലുള്ള മലവും (pale stools) ഉണ്ടാകാം. അൾട്രാസൗണ്ട്, ഹിഡ (HIDA) സ്കാൻ എന്നിവ വഴി നേരത്തെതന്നെ ബിലിയറി അട്രീഷ്യ കണ്ടെത്താം. ഉടൻ തന്നെ അടിയന്തര ശസ്ത്രക്രിയ (Kasai procedure) ചെയ്യേണ്ടതാണ്. രോഗനിർണയം വൈകിപ്പോയാൽ ഈ രോഗാവസ്ഥ സിറോസിസിലേക്കും കരളിന്റെ പ്രവർത്തനരാഹിത്യത്തിലേക്കും വഴിതെളിച്ചേക്കാം.

കോളിഡോക്കൽ സിസ്റ്റ്

പിത്തക്കുഴലിൽ സംഭവിക്കുന്ന അസാധാരണമായ വികാസം. ഇത് ഗർഭാവസ്ഥയിൽതന്നെ സംഭവിക്കുന്നു. സാധാരണമായി കരളിന് പുറത്തുള്ള പിത്തക്കുഴലിന്റെ ഭാഗങ്ങളെയാണ് ബാധിക്കുന്നത്. ചുരുക്കം ചിലപ്പോൾ കരളിനകത്തുള്ള പിത്തനാളങ്ങളേയും ബാധിക്കാം.

കരൾ ചുരുക്കത്തിന്റെ ലക്ഷണങ്ങൾ

കരളിലെ കോശങ്ങൾക്ക് പരിക്കുപറ്റി ക്രമേണ ഫൈബ്രോസിസ് (fibrosis) വന്നാണ് സിറോസിസിലേക്ക് നീങ്ങുന്നത്. ചുരുക്കം നിശ്ശബ്ദമായിരിക്കും. ക്രമേണ വലിയതോതിൽ രോഗലക്ഷണങ്ങൾ കാണപ്പെടും.

Representative Image| Photo: GettyImages
കണ്ണിനും മൂത്രത്തിനും കടുത്ത മഞ്ഞനിറം, സ്പൈഡർ നീവൈ (Spider nevi-ഒരു എട്ടുകാലിയുടെ കാലുകളുടെ രൂപത്തിൽ ചെറിയ രക്തധമനികളുടെ അറേഞ്ച്മെന്റ്. അവ നെഞ്ചിലും പുറത്തും കാണപ്പെടുന്ന അവസ്ഥ) എന്നിവ കരൾചുരുക്കത്തെ സൂചിപ്പിക്കുന്നു.

പാമാർ എറിത്തീമ (Palmar erythema- കൈവെള്ളകളിൽ ചുവപ്പുനിറം), മാലാർ എറിത്തീമ (മുഖത്ത് പ്രത്യക്ഷപ്പെടുന്ന തുടിപ്പ്), ക്ലബ്ബിങ് (clubbing-നഖത്തിന്റെ ആകൃതിയിൽ വരുന്ന മാറ്റം), അസൈറ്റിസ് (വയറിൽ വരുന്ന നീര്) കാലിൽ നീരുവന്ന് വീർക്കുന്നു, അമിതമായ ക്ഷീണം, പനി, രക്തം ഛർദിക്കുക, രക്തക്കുറവ്, ദേഹമാസകലം നീലിച്ച പാടുകൾ എന്നിവ കരൾ ചുരുങ്ങുന്നതിന്റെ ലക്ഷണങ്ങളാണ്.

കുട്ടികളിലെ ഫാറ്റി ലിവർ

നോൺ ആൽക്കഹോളിക് ഫാറ്റിലിവർ രോഗം കുട്ടികളിലും കാണപ്പെടാം. ജീവിതശൈലിയിലെ ക്രമക്കേടാണ് ഇതിന്റെ പ്രധാന കാരണം. അമിതവണ്ണം, അനിയന്ത്രിതമായ ആഹാരശൈലി, ജങ്കഫുഡ് ഉപയോഗം, വ്യായാമത്തിന്റെ അഭാവം എന്നിവ കുട്ടികളിൽ ഫാറ്റി ലിവർ അവസ്ഥയുണ്ടാക്കാം.

തുടക്കത്തിൽ ലക്ഷണങ്ങളൊന്നും ഉണ്ടാവാറില്ല. ക്രമേണ അത് സ്റ്റിയറ്റോഹെപ്പറ്റൈറ്റിസിനും(കരൾവീക്കം), സിറോസിസിനും വഴിയൊരുക്കും. അപ്പോൾ വയറുവേദന, മഞ്ഞപ്പിത്തം, വീക്കം, ക്ഷീണം, അസ്വസ്ഥത എന്നിവ അനുഭവപ്പെട്ടേക്കാം.

ആരോഗ്യകരമായ ഭക്ഷണരീതിയിലൂടെയും വ്യായാമത്തിലൂടെയും ഒരുപരിധി വരെ കരളിനെ പഴയപടി ആക്കാവുന്നതാണ്. ഫാറ്റിലിവറുള്ള കുട്ടികൾ ചോക്ലേറ്റ്, ഐസ്ക്രീം, മധുരപലഹാരങ്ങൾ എന്നിവ ഒഴിവാക്കണം. കൊഴുപ്പടങ്ങിയ ഭക്ഷണങ്ങളും ഒഴിവാക്കേണ്ടതാണ്. കൗമാരപ്രായക്കാരിൽ മദ്യത്തിന്റെ ഉപയോഗം ഈ സ്ഥിതിയെ കൂടുതൽ രൂക്ഷമാക്കി സിറോസിസിലേക്ക് പെട്ടെന്ന് എത്തിക്കാം. സോഫ്റ്റ് ഡ്രിങ്ക് ഉപയോഗം അമിതവണ്ണത്തിനും ഫാറ്റിലിവറിനും വഴിയൊരുക്കും. അതുകൊണ്ട് അവ കഴിവതും ഒഴിവാക്കുക. മാനസികമായ സമ്മർദം (പരീക്ഷ, വീട്ടിലെ പിരിമുറുക്കം) കാരണം പല കുട്ടികളും അമിതമായി ആഹാരം കഴിക്കുന്നത് ഫാറ്റിലിവറിന് വഴിയൊരുക്കുന്നു. നല്ലവണ്ണം വെള്ളം കുടിക്കുന്നതും ചിട്ടയായ വ്യായാമവും കുട്ടി ശീലമാക്കേണ്ടതാണ്.

പഴവർഗങ്ങളും ഇലവർഗങ്ങളും പച്ചക്കറികളും കഴിക്കണം. ടെലിവിഷന് മുന്നിലിരുന്ന് ഭക്ഷണം കഴിക്കുന്നതും അലസമായ കൊറിക്കുന്നതും ഒഴിവാക്കുക. കുടുംബത്തോടൊത്ത് ഊണുമേശയ്ക്ക് ചുറ്റുമിരുന്ന് ഉല്ലാസമായി ഭക്ഷണം കഴിക്കാൻ പ്രേരിപ്പിക്കുക.